Hallo du da oben. Eigentli bin i net der Typ, der gern um was bitt. Ganz und gar net. I komm schon zrecht in mein Leben. An und für sich. Aber diesmal hats mi total in d Kistn ghaut. Vier Prüfungen hintereinand vergurkt. A Wahnsinn! Da wirds langsam eng. Aber was soll i tuan? Im Grund genommen, san d Professoren schuld und des System an unserer Uni. Siebn is angsagt! Nur a Drittel von uns darf anscheinend durchkommen. Da bin i aber momentan net dabei. Kannst du mir vielleicht helfen? I wüsst net, wen i sonst um so was bitten könnt. Meine Freundin hätt ma vielleicht gholfen. Aber die hat si vorige Wochen endgültig vertschüsst. I bin ihr zu oft mit meine Freund unterwegs gewesen und hab sie vernachlässigt wie sie mir schon mehrmals gsagt hat. Was solls? I brauch meine Freund und i brauch das Herumziagn in die Beisln. Da lern i mehr als auf da Uni. Da lern i fürs Leben. Da siacht ma erst, was sie abspült in da Gsellschaft. Und wenn ma uns hin und wieder a bissl vollaufen lassen und durch die Nacht reiten, dann fühl i mi wirklich guat. Ehrlich! Zumindest für einige Stunden
Aber jetzt. Das Geld geht ma a mehr und mehr aus und i leb schon wieder auf Pump. Mein alten Herrn kann i a net immer anschnorrn. Der steckt so schon gnua in sein Nachwuchs, und seit mei Schwester a zum Studiern angfangen hat, schaut die Sach no schlechter aus für mi. Weil de zaht richtig an auf der Uni, die schafft Prüfung für Prüfung. Gut für sie, schlecht für mich. Und in letzter Zeit falln ma a kane richtigen Ausredn mehr ein, wenn i mi zu mein Studienfortgang fragen lassen muaß.
Du siehst, es schaut schlecht aus für mich. Und mei Radl habns ma a schon wieder gstohln, obwohls echt alt und verkommen war. Jetzt kann i a no zFuaß zur Uni hatschen oder die Bim nehmen. Aber die kost Geld und beim Schwarzfahrn lass i mi nimmer dawischen. Des hab i mir gschworn, weils mi schon zwamol dabei daklatscht hat.
Und noch was: In unserer WG läufts relativ guat. Bis auf die Nachbarn. Kannst du de austauschn? Na ja, das geht wahrscheinlich net. Aber warum regen sie de immer so auf, wann ma a bissal feiern in da Nacht. Des ghört do zum Leben
Kannst du mir helfen?
I vertrau auf di da oben. Denn so kanns wirkli net weitergehn